Dili, 19 Agostu 2021 – Komunidade ho uma-kain afetadu hamutuk 90 resin iha aldeia Beto-Tasi, suku Madohi, postu-administrativu Dom Aleixo, munisípiu Dili, sente preokupa no dúvida ho Governu nia planu atu estende Aeroportu Internasionál Prezidente Nicolau Lobato, Komoro, Dili.

“Ha’u mós preokupa tebes. […] sira (Governu) foti dadus ne’e ladún di’ak tanba sira nara-naran de’it, la tuir mapa ne’ebé mak iha. Loloos ne’e tuir mapa ne’ebé iha ne’e. […] Ami dúvida uitoan. Ami dúvida tanba lei fó sai tiha ona iha 1998 katak wainhira komunidade ida ka povu ida hela iha rai pedasuk oan ida liu ona tinan 5, nia iha direitu ba rai pedasuk ida ba atu halo to’os, uma no seluk tán. Sira mai fali dehan ne’e lei anteriór. Ne’ebé ami dúvida tanba lei ne’e hatuur dala ida ka ohin hatúr ida, aban hatúr ida ne’ebé ami ladún komprende,” Xefe aldeia Beto Afonso Rodrigues informa ba jornalista Timor News, iha kuarta (19/8) ne’e, iha aldeia refere.

Enkuantu komunidade iha aldeia refere hato’o mós nia preokupasaun relasiona ho kompensasaun ne’ebé Governu atu fó wainhira hasai sira, no fatin ne’ebé sira atu muda fali ba.

“Ami-nia laran ne’e susar tebes tanba sé ami ba iha bairu ka kampu seluk bee-moos ho ai-maran ne’e iha hanesan iha ne’e, entaun ami kontente, maibé ami ba fali bairu seluk mak bee ho ai ne’e susar tán entaun ami-nia laran ne’e dodok loos tanba ami-nia bairu ne’e halo buras ba ami-nia oan sira. Sira atu halo iha Setembru agora maibé seidauk loos tanba kona-ba rai nian ne’e seidauk loos ida. […] Kona-ba osan ganti rugi (kompensasaun) Governu seidauk fó ida. Sira dehan ganti rugi ne’e uma biasa ne’e sira fó $2.000 selae $2.500 maibé ida ne’e la to’o atu halo uma foun. Governu la prepara fatin mai ami,” dehan Isabel Soares nu’udar komunidade ida iha aldeia ne’ebá.

Tanba ne’e, nia husu atu Governu presiza prepara fatin ne’ebé di’ak ba sira molok atu hasai sira hodi reabilita ka estende Aeroportu.

"Ami husu ba Governu sé hanoin atu hasai ami hosi ne’e, haree mós fatin ida di’ak liu hodi lori ami ba tau fali iha ne’ebá,” Isabel dehan.