Dili, 05 Novembru 2021 – Komunidade iha munisípiu Dili kontinua soe fo’er arbiru iha fatin públiku sira, no ida ne’e halo ambiente la saudável tanba lori iis ne’ebé la konfortável ba komunidade rasik, inklui hatudu imajen la di’ak.
Jornalista Timor News, iha sexta (05/11) ne’e husu Administradora postu-administrativu Na’in-Feto, Herminia Martins, ninia opiniaun, no nia hateten katak komunidade iha postu-administrativu Na’in-Feto mós barak mak laiha konsiénsia tanba nia parte observa ona, sira kontinua soe fo’er arbiru no la kuida ambiente.
“Laiha konsiénsia komunidade ninian, ekipa hamoos tui-tuir fatin sira ho moos, pois sira soe fali fo’er arbiru nafatin,” Herminia dehan iha nia knaar-fatin, Na’in-Feto, Dili.
Tanba ne’e nia husu ba Governu atu halo sosializasaun ativu liután nune’e bele loke komunidade sira-nia konsiénsia hodi kuida no respeita ambiente.
“Husu ba Governu atu tún mai observa no halo mós sosializasaun ba komunidade sira para estima ambiente ho didi’ak,” nia akresenta.
Fonte: Timor News