Dili, 22 Jullu 2021 – Komunidade balu iha munisípiu Ermera lamenta ho kafé nia folin ne’ebé dehan katak tinan ne’e folin ladún di’ak ka folin tún liu kompara ho tinan kotuk, no ida ne’e la sustentável ba sira-nia nesesidade.
Sira informa ba Timor News katak kafé nia fuan mós menus iha tinan ida ne’e kompara ho tinan kotuk.
“Kafé ne’ebé ami fa’an ho kulit tasak kada kilógrama ida hetan sentavu 0.35. Kafé ne’ebé mak ami dulas habai ba maran nia iha kilógrama ho nia folin $1.40. ba ami hanesan komunidade sente triste tanba kafé mak dulas habai barbarak ho nia folin ne’ebé mak ki’ik liu. […] Kompara tinan kotuk ho tinan ne’e, iha tinan kotuk kafé nia fuan di’ak no folin mós di’ak. Liga ba tinan ida ne’e kafé fuan menus folin ki’ik, atu hatán de’it ba nesesidade família mós la to’o kompara ho tinan kotuk,” dehan Imaculada Soares, komunidade ida hosi aldeia saramata, suku Estadu, Ermera, ba Timor News iha kinta (22/7) ne’e via telefone.
Nia husu ba parte Governu atu hasa’e kafé nia folin nune’e komunidade bele uza osan hosi kafé hodi responde ba nesesidade ho sufisiente.
“Hanesan komunidade agrikultura hakarak rekomenda hela ba parte Governu atu hasa’e kafé nia folin atu nune’e komunidade sir abele hatán ba sira-nia nesesidade família ho di’ak,” dehan Imaculada.
Fonte: Timor News