Dili, 25 Setembru 2021 – Koordenadór merkadu Taibesi António Manuel de Araújo hateten katak komunidade iha merkadu Taibesi, Dili, barak mak soe lixu arbiru iha merkadu laran no la tau iha nia fatin própriu tanba laiha konsiénsia.
“Ita haree vendedór sira halo negósiu iha merkadu ita sempre fó avizu katak lixu sira ne’e tau iha nia fatin depois kareta mak mai foti lixu sira ne’e. Maibé ita haree iha ne’e, vendedór sira ne’e barak laiha konsiénsia, entaun ita tenke kontrola hela de’it, fó avizu hela de’it ba sira. Ida ne’e ha’u hanoin fila ba ida-idak nia konsiénsia,” Koordenadór António Manuel informa ba Timor News iha sábadu (25/9) ne’e iha merkadu Taibesi, Dili.
António Manuel esplika katak seidauk iha sansaun ruma ne’ebé aplika iha merkadu Taibesi ba sira ne’ebé soe lixu arbiru.
Maibé nia kontinua husu ba komunidade sira iha merkadu Taibesi atu labele soe fo’er arbiru atu mantéin ambiente moos no saudável.
Fonte: Timor News