Ainaru, 10 Outubru 2021 – Komunidade sira kria grupu ida ne’ebé kompostu hosi ema na’in-15 hodi kuda ai-kameli ne’ebé to’o agora hamutuk éktare 15 ona, iha aldeia Goulau, suku Leo-Lima, postu-administrativu Hatu-Udu, munisípiu Ainaru.

Alexandrinho da Costa nu’udar membru ida hosi grupu refere, informa katak, sira kuda ai-kameli ne’e dezde iha tinan 2006 tanba rona informasaun hosi Eiz Ministru Agrikultura Estanislau Aleixo ne’ebé dehan iha momentu ne’ebá katak tenke haburas rikusoin ai-kameli iha Timor-Leste.

“Ami ne’ebé kuda Ai-kameli ne’e fahe kada grupu, grupu ida (kompostu hosi) ema na’in-15. […] Ami kuda hahú hosi tinan 2006. Ami kuda éktare 15. […] Ai-kameli sira ne’e boot hotu ona. Iha momentu ne’ebá ami kuda balu mak susesu no balu nian la susesu tanba rai nia kualidade,” dehan Alexandrinho ba jornalista Timor News, ohin (10/10), via telefone.

Nia husu atu Governu apoia rede ba sira-nia grupu hodi halo lutu hale’u ai-kameli ne’ebé sira kuda tanba durante ne’e lutu laiha.

“Estadu mós la apoiu, parseiru ruma mós la apoiu. […] Ami rekomenda ba Governu sé bele karik Governu fó apoiu ba ami-nia grupu fó rede ruma para ami bele halo lutu hodi taka ai-kameli sira ne’e no fó mós ho osan ruma hodi sosa ai para bele harii atu prega rede,” Alexandrinho dehan.