Dili, 20 Outubru 2021 – Koordenadór refujiadu iha kampu Real Madrid, Manleuana, Dili, José Abrão Tani, hateten katak labarik ki’ik sira ne’ebé obrigatoriamente hela iha lona okos sente la tahan loro-manas durante hamahan-an iha lona nia okos fulan neen (6) resin ona.
“Hela demais ho kondisaun hanesan ne’e mós labarik ki’ik sira la tahan loro-manas. Ita-boot sira de’it la tahan tiha ona. Sé habai komunidade sira hanesan ne’e entaun atu tau nasaun nia dignidade iha ne’ebé. Agora atu tau fali orsamentu ba atu hola kareta, ró-ahi. Ko’alia kona-ba inundasaun ne’e isin-fulun ida nunka hamriik hodi haree ida ne’e. Ko’alia kona-ba sira-nia privadu ne’e sempre sai hela de’it iha mídia katak atu sosa ida ne’e, ida ne’ebá. Ema habai-an hanesan ikan-maran loos. Ami iha problema barak loos kompara ho boot sira toba iha AC laran, hán povu nia osan,” nia informa, ohin (20/10), iha Manleuana, Dili.
Nia akresenta katak sé Governu osan laiha atu responde karik entaun di’ak liu ko’alia ba públiku atu nune’e refujiadu sira ida-idak buka rasik fatin hodi labele hein fali solusaun hosi Governu tanba kleur ona solusaun laiha, no sira konsidera katak Governu kontinua bosok hodi halo kontente de’it sira.
“Sira hanesan mai habosok hela komunidade sira halo kontente de’it maibé na realidade laiha,” José akresenta.
Fonte: Timor News