Dili, 14 Jullu 2021 – Alterasaun Lei Eleitorál ba eleisaun prezidensiál ne’ebé Parlamentu Nasionál aprova tiha ona permite atu kria sentru votasaun paralelu ida iha Dili ba sidadaun votante sira ne’ebé labele ba sira-nia fatin resenseamentu iha munisípiu sira seluk bazeia ba kartaun eleitorál tanba ho razaun ruma.

Prezidente Repúblika Francisco Guterres Lú Olo promulga ona alterasaun daneen Lei Eleitorál refere iha segunda (12/7) liubá, no publika ona mós iha Jornál Repúblika ohin.

“Buat foun di’ak tebes foin hatama iha lei eleitorál ne’e mak sei iha sentru votasaun paralelu, iha Dili. Katak sei harii sentru ba de’it sidadaun votante sira ne’ebé labele bá sira-nia fatin resenseamentu iha munisípiu sira seluk tanba razaun médika, eskola ka hala’o hela knaar iha Dili. Wainhira rejista-an atu vota iha sentru votasaun paralelu ida, sira-nia naran sei hasai hosi lista munisípiu ne’ebé rejista uluk. Rejistu ne’e sei halo iha fatin determina hosi Lei ne’e, tuir situasaun ida-idak nian. Sentru paralelu ida sei aloka ba eleitór resenseadu iha Lautén, Baukau no Vikeke. Ida seluk ba eleitór resenseadu iha Likisá, Ermera no Ataúru no ida tán ba eleitór resenseadu iha Ainaru, Bobonaru, Kovalima no RAEOA. Governu bele loke to’o sentru paralelu tolu ne’e hotu maibé bele loke de’it wainhira, pelu menus, eleitór atus-ida mak rejista atu vota iha kada fatin,” haktuir informasaun ne’ebé Timor News asesu hosi divulgasaun Prezidénsia Repúblika ohin (15/7).

Lei ne’e fó ona mós dalan ba eleitór sira atu bele vota iha fatin kuarentena no tratamentu saúde.

Alterasaun ida tán mak profisionál sira iha órgaun komunikasaun sosiál, karik hala’o servisu ruma relasiona ho loron eleisaun prezidensiál, bele ona vota iha estasaun votu besik liu fatin ida ne’ebé sira hala’o hela sira-nia knaar ba.