Dili, 16 Agostu 2021 – Xefe Departamentu ba Kontrolu Poluisaun Carlos Conceição informa katak Dekretu Lei númeru 37/2020 kona-ba polítika Zero Plástiku ne’e fó hela dalan atu importa plástiku balu mai Timor-Leste.

Nia esplika, maske nune’e, empreza ne’ebé importa plátiku ne’e tenke selu taxa 30% hosi nia presu báziku ba kofre Estadu.

“Polítika Governu ba problema plástiku ne’e iha VIII Governu Konstitusionál, iha Dekretu Lei númeru 37/2020 ne’ebé mak atu bandu importa no mós prodúz plástiku iha ita-nia rain. Lei ida ne’e agora daudauk tama ona iha implementasaun. Ita halo ona atividade inspesaun ba loja sira atu fó hanoin ba sira labele importa no prodúz plástiku iha teritóriu timor laran. Maibé iha lei ne’e mós sei fó dalan ba plástiku balu ne’ebé mak sei bele importa mai Timor-Leste, maibé tenke selu taxa 30% hosi nia presu báziku ne’ebé mak sira sosa hosi nasaun orijen,” Carlos informa ba jornalista Timor News iha nia knaar-fatin, Dili.

Nia akresenta, parte Sekretaria Estadu Ambiente (SEA) mós to’o agora sei tolera hela atu sirkula plástiku balu ne’ebé importa tiha ona molok Dekretu Lei ne’e tama iha vigór.

“Ita halo kontrolu tanba ema-nia sasán sira ne’e balu tama mai molok lei ne’e tama iha vigór. Entaun problema ida ne’e mak to’o ohin loron hosi parte SEA ita sei bele fó etapa rua. Iha ida ita dehan katak face out, face out ne’e katak bandu totalmente. [...] Ida fali ita dehan katak face down katak hamenus,” nia esplika.

Carlos mós husu ba komunidade sira atu labele soe lixu plástiku arbiru tanba sei estraga bezeja no halo tasi nakonu ho plástiku.