Dili, 22 Setembru 2021 – Xefe Estadu Maiór Jenerál Forsa Defeza Timor-Leste (F-FDTL) Tenente Jenerál Lere Anan Timur informa, nia garante katak kolokasaun membru F-FDTL iha fronteira terestre sei la kria konflitu entre F-FDTL ho Unidade Patrullamentu Fronteira (UPF).
Lere dehan katak Governu nia planu atu koloka membru F-FDTL iha fronteira ne’e atu hala’o servisu ho UPF hodi kompleta malu.
“Ne’e hanesan servisu kompleta malu. Saida mak UPF nia servisu, husik sira hala’o sira-nia servisu. No saida mak F-FDTL nia servisu husik sira hala’o sira-nia servisu. Uluk, Polisia Nasionál Timor-Leste (PNTL) mak iha oin, agora F-FDTL,” dehan Lere, ohin (22/9), hafoin hasoru malu ho Prezidente Repúblika Francisco Guterres Lú Olo iha Palásiu Prezidensiál, Dili.
Tenente Jenerál ne’e afirma tán katak tenke koloka duni membru F-FDTL iha fronteira tanba ida ne’e Governu nia desizaun.
“Maske iha diverjénsia ka opiniaun la hanesan hosi líder nasionál sira, maibé hakarak ka lakohi F-FDTL tenke ba. Tanba ne’e desizaun Governu nian,” Lere afirma.
Fonte: Mídia Presidente da Repúblika (PR)