Dili, 11 Juñu 2021 – Grupu produtór sira kuda produtu Baunilla éktare 36 iha tinan 2020 liubá iha suku Leimea Sorin Balun, postu-administrativu Letefoho, Ermera, maibé oras ne’e sira enfrenta problema merkadu nian mak produtu refere ladún folin no nia presu la estável liuliu durante pandemia Covid-19.
“Sira hahú enfrenta problema ba merkadu ne’ebé mak hahú menus kompradór no presu ne’ebé mak la estável liuliu iha situasaun pandemia Covid-19,” temi iha divulgasaun ofisiál hosi Ministériu Turizmu, Komérsiu no Indústria (MTKI) sexta (11/6) ne’e.
Problema refere grupu produtór sira hosi Letefoho hato’o ona ba Vise Ministru Komérsiu no Indústria Domingos Lopes Antunes wainhira sira hasoru malu iha sexta ne’e iha Madarin, Dili, inklui mós kona-ba sira ladún iha koñesimentu relasiona ho klasifikasaun ka kategoria kualidade baunilla nian A, B no C ho nia presu sira ne’ebé mak durante ne’e oferese hosi kompradór sira, no oinsá buka mós merkadu ba sira-nia produtu kokoa no pimenta.
Hatán ba nia solusaun, Vise Ministru hateten parte MTCI sei kontakta kompradór Baunilla sira iha rai-laran hodi buka solusaun hamutuk.
Fonte: Mídia Ministério do Turismo, Comércio e Indústria (MTCI)