Europa, 11 Agostu 2021: Klubu futeból Paris Saint-Germain (PSG) anunsia ofisialmente katak asina ona kontratu ba tinan rua ho jogadór eiz kapitaun klubu Barcelona, Lionel Messi, haktuir BBC News tersa (10/8).
Lionel Messi to’o iha Paris, Fransa, iha tersa (10/8) ne’e hodi kompleta teste médiku no asina kontratu hodi muda ba PSG.
“Ha’u haksolok tebes tanba iha oportunidade ida ne’e Lionel Messi hili atu tama iha PSG. Ha’u-nia ben-vindu ba Messi no mós nia família,” hateten Prezidente PSG Nasser al-Khelaifi.
Prezidente PSG dehan, nia fiar katak Messi nia prezensa iha PSG sei halo istória no fó satisfasaun ba apoiante sira.
Enkuantu PSG nia jogadór foun Lionel Messi hateten, nia hakarak tebes atu hahú ona nia kapítulu foun iha PSG.
“Ha’u hakarak tebes atu hahú ona ha’u-nia kapítulu foun ida kona-ba ha’u-nia kareira foun iha Paris, ha’u hatene oinsá jogadór sira ho talentu oioin iha ne’e tanba ne’e ha’u hakarak tebes atu tama iha ekipa hamutuk ho sira,” dehan Messi.
Jogadór foun PSG nian ne’e sei uza jersey ho númeru 30 no sei sai nu’udar jogadór avansadu hamutuk ho Neymar Junior no Kylian Mbappe.
Fonte: BBC News