Dili, 26 Setembru 2021 – Abril Xavier Quintão nu’udar estudante universitáriu ida, fahe nia tempu ba eskola no mós ba atividade fila-liman. Loro-loron Abril fa’an modo hafoin fila hosi eskola hodi hetan rasik osan atu sustenta nesesidade bázika sira.

“Ha’u jere tempu ba eskola no fa’an modo iha oras ne’ebé mak ha’u iha aula eskola ha’u sei taka tiha modo, ha’u sei ba tuir aula. Ha’u fila hosi eskola ha’u kontinua fa’an modo hanesan baibain […] Osan sira ne’ebé ha’u hetan hosi fa’an modo ne’e osan sira ne’e ha’u rai hela hodi uza ba ha’u-nia presiza loro-loron nian no balu ha’u uza hodi ba eskola,” Estudante Universidade da Paz (UNPAZ) ho semeste VIII ne’e informa ba Timor News ohin (26/9) via telefone.

Aléin hosi fa’an modo, Abril mós aproveita buka osan iha situasaun períodu Konfinamentu Obrigatóriu foin daudauk ne’e liuhosi halo ‘ojek’ ho nia motor tanba haree katak transporte públiku sira la movimenta hotu iha Dili.

Nia husu ba foinsa’e sira atu labele sente moe hodi hala’o rasik atividade ruma ne’ebé bele tulun atu hetan osan sustentável ba nesesidade bázika.

“Ita moe ho atividade sira ne’e ita la manán buat ida,” nia dehan.