Dili, 13 Setembru 2021 – Governu Timor-Leste liuhosi reuniaun Konsellu Ministru ne’ebé hala’o ohin (13/9) iha Palásiu Governu, Dili, deside ona hodi dekreta Lutu Nasionál ba antigu Prezidente Repúblika Portugeza Jorge Sampaio nia mate iha teritóriu nasionál tomak, ba períodu loron tolu.

Lutu nasionál durante loron tolu ne’e hahú ohin ne’ebé hasa’e ona bandeira iha Palásiu Governu nia oin to’o iha klaran de’it, to’o 16 Setembru 2021 tuku 07:59.

“Bandeira nasionál sei hasa’e to’o klaran de’it ka meia haste iha paíz laran tomak, iha fatin sira uzu obrigatória nian, inklui misaun diplomátika sira,” Governu esplika iha komunikadu imprensa ne’ebé Timor News asesu ohin.

Jorge Sampaio, mate iha 10 Setembru liubá, no Governu Timor-Leste konsidera nia nu’udar ema ida ne’ebé mak relevante tebes hodi defende povu no valór konstitusionál Timor-Leste nian.

Primeiru-Ministru Taur Matan Ruak, iha loron sesta liubá, afirma katak Jorge Sampaio “hanesan Prezidente ida ne’ebé kontribui maka’as ba Restaurasaun Independénsia Nasionál, iha ne’ebé nia mai nu’udar convidado-da-honra iha serimónia ne’ebé hala’o iha 20 Maiu 2002”. 

Xefe Governu mós hateten tán katak “Eiz Prezidente Jorge Sampaio sei lembra iha Mundu nu’udar figura boot iha kauza no liberdade no rekoñese nu’udar Belun Boot Timor-Leste no timoroan nian”.

Iha tinan 2016, Jorge Sampaio simu Grande Kolár Órden Timor-Leste, nu’udar rekoñesimentu ba ninia solidariedade no apoiu ativu iha luta ba independénsia Timor-Leste. Kondekorasaun ne’e entrega hosi Primeiru-Ministru atuál ne’ebé iha momentu ne’ebá hanesan Prezidente Repúblika, Taur Matan Ruak, iha Lisboa. Iha okaziaun, Taur Matan Ruak manifesta ‘rekoñesimentu kle’an ba umanizmu, espresaun solidariedade ne’ebé barak tebes no apoiu ativu durante tinan barak, fó-moris ba luta ba liberdade, auto-determinasaun no independénsia Timor-Leste nian’.

Jorge Sampaio ninia vizita ikus mai Timor-Leste nu’udar Xefe Estadu, iha tinan 2006, Parlamentu Nasionál atribui ba nia títulu Sidadaun Onoráriu Repúblika Demokrátika Timor-Leste.