Dili, 07 Outubru 2021 – Madalena da Costa nu’udar sidadaun timoroan ida ho kondisaun defisiénsia fíziku ne’ebé oras ne’e hala’o hela knaar iha organizasaun Raes Hadomi Timoroan (RHTO), husu ba públiku atu bolu ema ne’ebé ho kondisaun defisiénsia fíziku ho terminolojia loloos.
Nia konsidera katak dala-barak família rasik mak bolu fali ho terminolojia ne’ebé la loos ka la edukativu.
“Ha’u-nia maluk defisiente sira, dala-barak iha públiku ema sempre bolu sira la’os ho terminolojia loloos. Agora ita bele dehan katak terminolojia ne’ebé mak merese uza hodi bolu ema ne’ebé ho kondisaun defisiénsia fíziku ne’e komesa belar ona. Maibé sei iha nafatin balu, piór liu mak iha família uma laran ne’ebé dalaruma sira sempre uza liafuan ida ne’ebé mak la merese atu hodi bolu ema defisiente sira. Sira sempre bolu dehan ‘liman aat’, ‘ain aat’, ‘matan aat’. Maibé atu dehan katak liafuan ida ‘aat’ ne’e refere ba sasán. Ita ema ne’e ida la aat. Sasán aat ita hi’it ba tau iha sampah, ema la aat, tanba ne’e tenke komprende. Ba família sira, haree família ruma iha uma-laran ho kondisaun defisiénsia, labele moe, labele subar, tanba hotu-hotu iha direitu hanesan,” Madalena informa ba jornalista Timor News, ohin (07/10), iha nia knaar-fatin, Taibesi, Dili.
Madalena mós husu ba Governu atu kria kondisaun ne’ebé justu relasiona ho Governu ninia edifísiu hotu-hotu atu bele asesível ba ema ne’ebé ho kondisaun defisiénsia fíziku.
“Uma sira ne’e balu di’ak ona, maibé balu seidauk. Sira ba enkontru iha andár leten no konvida ita ba partisipa maibé difikulta atu asesu iha leten ne’ebá,” nia dehan.
Fonte: Timor News