Dili, 02 Setembru 2021 – Governu husu ba populasaun sira ne’ebé oras ne’e hela de’it iha uma durante períodu lockdown ka konfinamentu obrigatóriu, atu mantéin kalma no kontrola tensaun atu nune’e bele evita violénsia iha uma-laran ne’ebé fó risku ba labarik no feto sira.
Governu husu mós atu inan-aman sira iha uma labele uza violénsia tanba bele estraga labarik nia dezenvolvimentu mentál no fíziku.
“Uza liafuan pozitivu no ko’alia mamar ho ita-nia oan, tanba hakilar aumenta de’it ita no ita-nia oan nia nervozu. Labele uza violénsia tanba bele estraga labarik nia dezenvolvimentu mentál no fíziku,” informa parte Governu ba populasaun sira liuhosi infografia ne’ebé Timor News asesu ohin (02/9).
Nune’e, iha infografia esplika, dalan di’ak liu mak rezolve problema ruma ka labarik sira-nia sala iha uma-laran mak liuhosi hanorin sira atu oinsá responsabiliza no tulun sira atu aprende disiplina, tanba ida ne’e mak dalan efetivu liu duké hakilar no baku.
Fonte: Mídia Gabinete do Primeiro-Ministro (GPM)