Dili, 21 Setembru 2021 – Autoridade munisípiu Manufahi hamutuk ho to’os-na’in sira, iha tersa (21/9) ne’e, kolleta fore-mungu éktare 37,5 iha suku Betanu, postu-administrativu Same, munisípiu Manufahi.
Iha programa Kolleta ne’e, Diretór Servisu Agrikultura munisípiu Manufahi hateten, fore-mungu éktare 37,5 ne’e nu’udar rezultadu hosi programa ‘Prodúz La Kolen’ ne’ebé Ministériu Agrikultura no Peska ho parseiru balu introdúz ba to’os-na’in sira iha Betanu katak la presiza fila rai maibé lere de’it du’ut no rega erbízida depois kuda ona fore-mungu.
Iha fatin hanesan, To’os-na’in Frederito da Costa Fernandez dehan katak nia sente urgullu tanba ho programa prodúz la kolen ne’e to’os-na’in sira konsege kolleta produsaun fore-mungu karól 10 iha faze dahuluk no daruak, enkuantu faze datoluk nian foin mak kolleta no hatudu rezultadu di’ak.
Tanba ne’e Frederito rekomenda ba Governu atu kría merkadu permanente hodi sosa produsaun ne’ebé to’os-na’in sira prodúz, nune’e bele motíva nafatin to’os-na’in sira atu badinas hodi kontinua hasa’e produsaun agríkula iha munisípiu Manufahi.
Hatán ba to’os-na’in nia rekomendasaun, Administradór munisípiu Manufahi Arantes Isaac Sarmento hateten, administrasaun munisípiu servisu hamutuk ho FAO no Ministériu Edukasaun atu sosa fore-mungu ne’ebé prodúz hosi to’os-na’in sira iha Manufahi, hodi apoia programa merenda eskolár ba estudante na’in-4.200 iha munisípiu Manufahi.
Fonte: Diáriu "Roman ba Sosiedade" Manufahi