Manufahi, 8 Novembru 2022 -  Administradór Manufahi, Arantes Isaac Sarmento, halo abertura ba feira selebrasaun ofisiál dékada ida no tinan atus-ida funu revolusaun Manufahi 1912 iha Luak, Manufahi. Feira ne'e nu’udar komemorasaun dékada ida tanba funu revolusaun Manufahi 1912 ofisialmente hahú komemora iha loron 28 fulan Novembru tinan 2012 liu bá. Feira ne'e sei hala'o durante fulan ida hahú iha loron 8 fulan Novembru 2022 no sei remata iha loron 7 fulan Dezembru 2022.

Objetivu hosi festeja dékade ida no selebrasaun tinan atus-ida funu revolusaun Manufahi 1912 mak atu fó oportunidade ba negosiante no grupu industria ki'ik sira atu fa'an sira-nia produtu hodi hasa'e rendimentu no hadi’ak ekonomia família-nian.

Iha feira ne'e, komisaun organizadora realiza mós atividade jogu tradisionál no jogu sira seluk, nune’e, jogu sira-ne'e ninia partisipante sira bele sosa mós prodútu lokál ne'ebé komunidade sira fa'an iha ne'ebá.

Partisipa iha abartura feira ne'e mak hanesan autóridade munisipál, lideransa komunitária, lisan-na'in, inklui komunidade sira.