Manufahi, 16 Setembru 2021 – Akontese iha munisípiu Manufahi, pesoál saúde balu abandona fatin izolamentu hodi ba partisipa tiha iha festa.
Administradór Manufahi Arantes Isaac Sarmento hato’o nia lamentasaun kona-ba hahalok hosi pesoál saúde balu ne’ebé la kumpri regra, ohin (16/9), iha reunian kona-ba avaliasaun servisu prevensaun Covid-19 ne’ebé realiza iha Administrasaun Munisipál. Nia husu atu pesoál saúde sira labele hatudu hahalok aat ba komunidade sira.
Arantes mós preokupa ho kondisaun fatin izolamentu ne’ebé fo’er, tanba ne’e nia husu atu pesoál saúde sira tenke servisu ho seriedade.
Hatán ba lamentasaun hosi Administradór, Diretór Interinu Servisu Saúde Munisípiu Manufahi, Orlando Martins rekoñese duni katak pesoál saúde balu kontra regra hodi abandona fatin izolamentu no ba partisipa tiha iha festa, tanba ne'e autoridade saúde Manufahi sei aplika sansaun disiplinár.
Relasiona ho fatin Izolamentu fo’er, Orlando Martins hateten katak, fatin izolamentu ho kondisaun fo’er tanba kliner limitadu.
Fonte: Diáriu "Roman ba Sosiedade" Manufahi