Manufahi, 06 Dezembru 2021 – Fundasaun Ázia liuhosi programa Nabilan, ohin (06/12), organiza autoridade no komunidade hodi halo Kampaña loron 16 Ativizmu kontra violénsia hasoru feto no labarik, iha suku Letefoho postu administrativu Same, munisípiu Manufahi.
Iha atividade refere, Sekretáriu Estadu Igualidade no Inkluzaun (SEII), munisípiu Manufahi, Natalino Corte Real Cardoso hato’o agradesimentu ba fundasaun Ázia no parseiru hotu ne’ebé servisu hamutuk ho Governu hodi realiza programa kampaña kontra violénsia hasoru feto no labarik iha Timor-Leste, liuliu iha munisípiu Manufahi ho intensaun atu bolu atensaun ba ema hotu hakribi violénsia hasoru feto no labarik iha família no sosiedade.
Iha fatin hanesan, reprezentante Departament of Foreign Afairs Trade (DFAT) Geordie hatete katak, mundu tomak daudauk ne’e la tolera ona ba kualkér tipu violénsia oioin hasoru feto no labarik hanesan buat baibain, maibé ema hotu tenke konsidera katak, violénsia hanesan krime ne’ebé tenke halakon iha mundu no iha Timor-Leste.
Aléin hosi ne’e, xefe suku Letefoho, João da Costa Noronha, konsidera katak violénsia hasoru feto la’os ona buat baibain maibé konsidera hanesan krime públiku, no mós lideransa komunitária iha suku Letefoho la tolera violénsia hasoru feto no labarik.
Enkuantu atividade refere autoridade no komunidade sira marxa iha iha sidade Same, animasaun hosi grupu foin-sa'e sira ho drama no jogu Samea (Ular Tanga) no mós pergunta ba partisipante sira hodi hafanu ema hotu moris saudavel iha família no sosiedade.
Fonte: Diáriu "Roman ba Sosiedade" Manufahi