Dili, 23 Setembru 2021 – Ministériu Agrikultura no Peska (MAP) apoia gazoel tonelada 5.000 hodi fila to’os-na’in sira-nia to’os éktare 500 ho gratuita iha postu administratrivu Same, munisípiu Manufahi.

Diretór Servisu Agrikultura Munisípiu Manufahi Aurélio dos Santos Marques, iha kinta (23/09) ne’e hateten, kombustível tonelada 5.000 ne’e ba faze dahuluk nian hodi fila rai gratuita ba to’os-na’in sira iha suku Betanu, Daisua, Babulu, Letefoho, Holarua no Tututluro. Servísu agrikultura Manufahi sei kontinua halo pedidu ba MAP atu apoia tán kombustível, hodi kontinua fila grátuita agrikultór sira-nia to’os iha postu-administrativu Same, Fatuberliu no Alas.

Tuir Diretór Aurélio katak, tuir loloos prosesu fila rai ne’e hahú iha fulan Outubru maibé tanba kondisaun tratór boot 30 resin iha Manufahi, utilíza de’it tratór 6 tanba maiória kondisaun aat. Hosi tratór 6 ne’ebé daudauk ne’e uza, tratór 2 mak ho kondisaun foun no tratór 4 maske halo ona manutensaun liuhosi programa Covid-19 maibé kondisaun la normál tanba roda inklui ekipamentu sira seluk.

Difikuldade seluk mak hanesan, orsamentu limitadu atu troka óleu ba tratór 6 ne’ebé daudauk ne’e uza, tanba kada tratór gasta óleu litru 50 maibé parte servisu agrikultura kontinua buka meiu hodi rezolve.