Manufahi, 14 Janeiru 2022- Ministériu Agrikultura no Peskas (MAP) munisípiu Manufahi hamutuk ho autoridade sira, iha kinta-feira (13/01) ne’e, kuda ai -Kaméli oan huun 277 iha fatin istóriku Don Boa Ventura Luak Manufahi hodi hafutar fatin refere.
Diretór Agrikultura Munisípiu Manufahi, Aurelio do Santos Marques hatete, objetivu kuda ai-kameli hirak ne’e hodi komemora loron mundiál floresta nian ne’ebé sei selebra iha 27/02/2022, hanesan loron espesiál sándalu no floresta tanba ai-kameli konsidera hanesan patrimóniu ambientál nasionál.
Iha fatin hanesan administradór munisípiu Manufahi, Arantes Isaac Saramento hatete katak, lansamentu kuda ai-kameli ba dahuluk ne’e importante, tanba atu proteje ambiente, konserva no hasa'e produsaun ai-kameli iha munisípiu Manufahi, Arantes mós apela ba komunidade iha suku Daisua postu-administrativu Same, asegura ai-kameli oan ne'ebé kuda ona iha fatin refere.
Enkuantu iha tinan 2020 MAP kopera ho ajénsia Internasiónal Deutsche Gusellschaft for Internatinale Zusammenarbeit (sigla Jerman GIZ), prodús ai-kameli oan huun 19.150 iha sentru viveirus Betanu, no tinan 2021 prodús tan ai-kameli oan huun 96.000, hodi distribui ba sentru viveirus komunitária Betanu postu administrativu Same, suku Dotik postu administrativu Alas no Turiskai.
Fonte: Diáriu "Roman ba Sosiedade" Manufahi