Kovalima, 24 Setembru 2021 - Ministériu Agríkultura no Peska (MAP) liuhosi Diresaun Nasionál Estensaun Agríkola (DNEA), Departamentu Formasaun no Kapasitasaun Estensaun Agrikola, iha sexta (24/9) ne’e, realiza Eskola Kampu Agrikultór hodi halo lansamentu ba ‘Kuda Hare Tuir Sistema Prátika Agríkultura Di’ak (PAD) Uza Adubus Orgániku Nasa, iha aldeia Oebaba SP II, suku Raimea, postu-administrativu Zumalai, munisípiu Kovalima.
Iha okaziaun ne’e, Xefe Departamentu Formasaun no Kapasitasaun Estensaun Agríkola, Rui Pereira, hateten katak objetivu hosi atividade refere mak atu kapasita agrikultór sira hodi komprende oinsá kuda hare ho sistema PAD ninia lala’ok utiliza adubus Poc Nasa.
Nia mós husu ba agrikultór sira ne’ebé la envolve iha grupu atu bele aprende tutan fali hosi sira ne’ebé mak implementa ona aktividade ida ne’e.
Koordenadór Estensionista Zumalai David da Cruz haktuir katak, atividade ne’e hala’o iha fulan Setembru nia laran, grupu sira hahú prepara rai, selesaun fini, oinsá aplika adubus orgánika Poc Nasa no kapasitasaun ba grupu agrikultór sira no ikus liu mak preparasaun fali ba eskola kampu kona-ba oinsá kuda hare tuir sistema PAD.
“Atividade eskola kampu ida ne’e importante tebes ba ita-nia grupu agrikultór sira liuliu ba grupu ne’ebé mak aplika ona adubus Poc Nasa. Hakarak rekomenda nafatin ba iha Departementu Formasaun no Kapasitasaun Estensaun Agrikola, atu kapasita nafatin ita-nia agrikultór atu bele komprende di’ak liután saida mak adubus Poc Nasa no PAD,” David dehan.
Fonte: Mídia Ministério da Agricultura e Pescas (MAP)