Manufahi, 29 Setembru 2023 - Ministru Agrikultura Pekuária Peska no Floresta (MAPPF), Marcos da Cruz, kompromete sei halo manutensaun ba tratór boot hamutuk unidade 28 iha sentru mekanizasaun Betano, no sei halo mós konstrusaun foun ba irrigasaun Karau-ulun Betano, atu nune'e agrikultór sira bele halo filafali sira-nia natar ne'ebé mak durante ne'e abandona hela. MAPPF hato'o promesa sira ne'e bainhira oberva direta tratór no irrigasaun iha Sesta (29/09) iha  suku Betanu, postu administrativu Same, munisípiu Manufahi.

Marcos da Cruz dehan katak tratór hirak ne'e governu sosa iha tinan 2009 hamutuk unidade 36, maibé daudaun ne'e balu ho kondisaun aat, balu fali halo tiha ona leilaun, no hela 31, maibé 28 de'it mak presiza halo manutensaun. Tanba ne'e, nia orienta ona mekániku sira atu foti dadus no submete ba iha MAPPF, nune'e bele uza orsamentu retifikativu hodi halo manutensaun. Enkuantu kona-ba irrigasaun Karau-ulun ne'ebé hetan estragu hosi udan bo'ot foin lalais ne'e, inklui rai henek intupidu iha kanál irrigasaun nian, ba fase dahuluk MAPPF prevee tiha ona orsamentu retifikativu hamutuk $95,000.00 hodi hadi'a ho emerjénsia parte ne'ebé hetan estragu, inklui hamoos sedimentasaun irrigasaun nian, hodi fornese daudaun bee ba agrikultór sira-nia natar iha suku Betano. MAPPF prevee mós orsamentu atu halo dezeñu ba konstrusaun foun hodi modifika parte balu iha tinan 2024, nune'e bele redús sedimentasaun tama ba kanu irrigasaun nian kuandu iha tempu udan boot.