Dili, 08 Marsu 2022: Vendedór ai-funan Mario da Conceição husu ba Prezidente Repúblika (PR) foun ba períodu 2022-2027 atu servisu hamutuk ho Governu hodi foka ba dezenvolvimentu no tau-matan ba povu nia halerik.

Mario hato’o informasaun hirak ne’e wainhira dada lia ho jornalista Timor News ohin (08/03) iha Manleuana Dili, relasiona ho PR foun ne'ebé sei mai. Vendedór  ai-funan ne’e, husu  PR atu servisu hamutuk ho Governu hodi kontrola orsamentu ne’ebé aloka ba iha ministériu ida-idak, nune’e bele aselera lalais dezenvolvimentu nasionál.

“Husu ba prezidente foun tenke kontrola maka’as hosi ministru tún to’o mai kraik, osan sirkula ba pembangunan (dezenvolvimentu) ka lae, hosi kada ministériu ida, atu nune’e  dezenvolvimentu rai ne’e bele la’o ba oin,” Mario hateten.

Nia mós husu ba PR foun ne’ebé sei mai, atu besik ba povu no tenke sai nu’udar PR ba povu tomak, labele ba de’it grupu ka parte balu.

Tuir kalendáriu hosi Komisaun Nasionál Eleisaun (CNE, sigla portugés) katak, eleisaun prezidensiál sei hala’o iha loron 19 fulan Marsu tinan 2022, no PR ne'ebé eleitu sei simu pose iha loron 20  fulan Maiu tinan 2022.