Dili, 13 Jullu 2021 – Ministériu Defeza (MD) Estadus Unidus Amérika (EUA) mak finansia projetu reabilitasaun Aeródromu Baukau, Timor-Leste, ho montante osan dólar amerikanu millaun 10.
“Projetu reabilitasaun (Aeródromu Baukau) ne’e finansia hosi Ministériu Defeza EUA ho montante dólar amerikanu millaun 10 ho objetivu atu hadi’ak kapasidade F-FDTL nian iha área seguransa, apoiu umanitária no resposta ba dezastre naturál,” haktuir informasaun ofisiál hosi Gabinete Primeiru-Ministru publika ohin (13/7).
Parte Governu Timor-Leste liuhosi Primeiru-Ministru Taur Matan Ruak hamutuk ho Embaixadór EUA iha Timor-Leste Kevin Blackstone lansa ona fatuk dahuluk iha segunda (12/7) ne’e ba projetu reabilitasaun refere nu’udar marka ofisiál ba inísiu reabilitasaun.
Iha inísiu fulan Outubru tinan ne’e, ekipa konjunta Enjeñaria hosi F-FDTL no militár EUA sei hala’o reabilitasaun eskalaun ki’ik iha Aeródromu Baukau inklui hadi’a lutu perímetru no konstrusaun armajen ba ekipamentu ne’ebé F-FDTL sei utiliza ba operasaun no manutensaun ba ninia komponente aéreu.
Fonte: Mídia Gabinete do Primeiro-Ministro (GPM)