Dili, 04 Outubru 2023 - Ministra Edukasaun (ME), Dulce de Jesus Soares, iha Kuarta (04/10) ne'e halo tiha ona abertura ba atividade levantamentu dadus ba profesór sira-nian, ho objetivu atu halo análiza ba kuadru pesoál profesór sira hotu iha territóriu nasionál nune'e bele garante kualidade edukasaun Timor-Leste nian iha futuru. Levantamentu dadus refere sei responsabiliza hosi enumeradór hamutuk na'in-60 kobre ba munisípiu hotu inklui Rejiaun Adminístrativa Espesiál Oekusi Ambenu (RAEOA), hahú hosi loron 4 fulan Outubru to'o 15 Novembru tinan 2023.  

Iha abertura ne’e, ME Dulce hateten katak hosi levantamentu dadus ne’e sei fó informasaun lubuk ida ba sira, hodi hatene loloos eskola iha territóriu laran ne'ebé mak profesór barak, menus, profesór permanente, kontratadu hamutuk hira no seluk tan, nune'e bele ajuda ME hodi foti desizaun ruma bazeia ba dadus sira ne'e, hodi bele dezenvolve setór edukasaun iha Timor-Leste. Nia mós dehan tan katak, tuir planu governu ba dasia nian, sei halo rekrutamentu ba profesór no profesora foun, maibé sei haree mós ba iha dadus ne'ebé sei verifika hafoin bele rekruta.