
Bobonaru, 25 Setembru 2023 - Ministra Edukasaun (ME) Dulce de Jesus Soares, iha Segunda (25/09) ne’e hamutuk ho dirijente edukasaun nasionál no munisipál inaugura eskola ensinu báziku filiál (EBF) Omelai, aldeia Omelai, suku Molop, postu administrativu Bobonaru, munisípiu Bobonaru ne’ebé mak apoiu hosi fundasaun “Spend it Well” hosi Austrália.
Iha inaugurasaun ne’e Dulce hateten katak Fundasaun “Spend it Well” hanesan parseiru Ministériu Edukasaun nian ne'ebé mak apoia governu hodi harii tiha ona eskola hamutuk sanulu resin hitu (17) iha Timor-Leste (TL), inklui EBF Omelai ne’ebé inaugura daudaun. EBF Omelai hamutuk sala aula tolu ho fasilidade eskola nian hanesan kadeira, meza, kuadru no seluk tan. Iha programa governu ba dasia iha área edukasaun nian, iha tiha ona planu atu harii tan eskola hamutuk 1200 tuir orsamentu no prioridade ne’ebé mak define tiha ona.
Eskola EBF Omelai iha profesór no profesora hamutuk na'in-12 inklui permanente na'in tolu, kontratadu na'in neen no voluntáriu na'in tolu. Iha serimónia inaugurasaun eskola refere hetan partisipasaun hosi prezidente autoridade munisípiu Bobonaru, prezidente ONG Mahon, autoridade lokál, no komunidade sira.















