Manufahi, 16 Abril 2021 – Membu Polísia Nasionál Timor-Leste (PNTL) ida halo asaun provokativu iha fatin kuarentena Orbo, Same, Manufahi, ohin (16/4), tanba la konkorda ho desizaun atu transporta nia oan ne’ebé deteta pozitivu Covid-19 ba fatin izolamentu iha Dili.

Parte saúde deteta estudante na’in-12 hosi kuarentena Orbo, Same, mak pozitivu Covid-19 inklui membru PNTL ne'e nia oan, nune’e sira-nia inan aman halo prosesu negosiasaun ho Administradór Manufahi Isaac Arantes Sarmento hodi buka solusaun atu transporta estudante na’in-12 ne’e ba fatin izolamentu iha Dili, maibé derepente mosu asaun provokativu hosi oknum membru PNTL ida hatais farda kompletu hodi baku hirus matan no loke kamiza.

Ho ida ne’e, mosu kedas asaun hosi estudante sira ho hakilar no baku rahun vidru janela iha fatin kuarentena Orbo hodi impede deslokasaun estudante na’in-12 ba Dili.

Enkuantu iha prosesu negosiasaun, hosi parte inan-aman no estudante sira konkorda atu tranfere de’it estudante na’in-12 ne’e ba fatin izolamentu Kajerna Polísia Holarua, Same.

Jestór programa Fundasaun Luta ba Futuru (F-LBF) Domingos Rodrigues lamenta tebes ho situasaun refere hodi dehan, “tuir loloos nu’udar pesoál seguransa tenke koopera hodi buka solusaun, la’os halo fali dezentendimentu”.

Relasiona ho problema ne’e, Komandante Komandu Polísia Manufahi Superintendente Polísia Joni Viana das Regras hateten, Komandu sei bolu oknum membru PNTL ne’e hodi submete ba prosesu investigasaun hodi justifika nia asaun.