Dili, 19 Agostu 2021 – Ministru Ensinu Superiór, Siénsia no Kultura (MESSK) Longuinhos dos Santos hateten katak hosi nia parte laiha planu atu lalin hikas estudante sira ne’ebé oras ne’e iha hela munisípiu seluk hodi fila mai Dili atu partisipa iha aula prezensiál ne’ebé reativa ona.
“Ita laiha planu ba ida ne’e,” dehan Longuinhos ba jornalista Timor News, ohin (19/8) iha edifísiu Ministériu Solidariedade Sosiál no Inkluzaun (MSSI), Kaikoli, Dili.
Tanba ne’e, nia husu ba estudante universitáriu sira ne’ebé oras ne’e iha hela munisípiu seluk atu esforsa-an hodi fila hikas mai Dili nune’e bele partisipa iha aula prezensiál.
“Estudante sira presiza esforsa-an para atu fila-fali atu bele hala’o aula prezensiál. Purtantu ne’e ha’u hanoin estudante presiza esforsa-an para oinsá mak atu partisipa iha aula prezensiál,” dehan MESSK.
Enkuantu estudante balu iha Ermera no mós munisípiu seluk hato’o ona sira-nia preokupasaun ba Timor News kona-ba transporte públiku ne’ebé labele movimenta mai Dili hodi difikulta sira atu fila mai Dili tanba aula prezensiál reativa ona.
Responde ba preokupasaun ida ne’e, MESSK rasik hateten, laiha planu atu lori sira fila no sira tenke esforsa-an rasik hodi fila. MESSK mós hato’o mensajen ba estudante sira atu simu vasina tanba estudante nu’udar instrumentu ba komunidade hodi halo tuir.
“Vasina, vasina no vasina tanba vasina importante atu bele hasa’e imunidade sidadaun sira nian inklui estudante sira, no estudante sira mak sai hanesan mata-dalan di’ak, sai hanesan instrumentu ba komunidade,” informa MESSK.
Fonte: Timor News