Dili, 05 Outubru 2021 – Ministériu Finansa (MF) informa katak taxa ezekusaun Orsamentu Jerál Estadu (OJE) 2021 to’o iha 30 Setembru 2021 atinje millaun $949.2 ka 47% hosi totál orsamentu billaun $2.1.
MF esplika, “taxa ezekusaun reál ba programa Boa Governasaun no Jestaun Institusionál ne’ebé nia objetivu atu sustenta mákina Estadu, ezekuta ona millaun $314,8 ka 69% hosi orsamentu alokadu millaun $456,7. Enkuantu taxa ezekusaun reál ba kategoria programa esensiál entidade sira nian foin mak ezekuta millaun $634,4 ka 40% hosi orsamentu alokadu billaun $1,5”.
Enkuantu taxa ezekusaun reál tuir klasifikasaun ekonómiku, aas liu mak iha kategoria Transferénsia Públika 74%, tuir kedas ho Saláriu no Vensimentu 65%, Bens no Servisu 35% no Kapitál Menór 14%. Kapital Dezenvolvimentu foin mak ezekuta 11%.
Kona-ba Fundu Espesiál Covid-19 ne’ebé mak kria iha tinan kotuk atu responde ba pandemia, to’o iha 30 Setembru 2021, nia ezekusaun reál atinje ona millaun $108,6 ka 38% hosi totál orsamentu retifikativu alokadu millaun $287,6.
Fonte: Ministério das Finanças (MF)