Dili, 16 Jullu 2021 – Governu liuhosi Ministériu Finansa (MF) realiza ona pagamentu izensaun propinas ba estudante sira iha Ensinu Superiór hamutuk 18 ho montante orsamentu dólar amerikanu millaun 5.6 (millaun $5.6).

Estudante hosi Ensinu Superiór 18 ne’ebé mak sai nu’udar benefisiáriu ba pagamentu izensaun propinas ne’e ho totál na’in-64.619. Maibé pagamentu refere ba de’it semestre ida ne’ebé impoin Serka Sanitária ba.

Gabinete MF haktuir ohin (16/7) katak, “pagamentu izensaun propinas estudante Instituisaun Ensinu Superiór (IES) ne’e halo hafoin Ministériu Ensinu Superiór, Siénsia no Kultura (MESSK) konkorda hodi halo alterasaun ba Memorandu Entendimentu (MoU, sigla Inglés) ho IES sira kona-ba propinas ba estudante sira”.

IES públiku no privadu sira ne’ebé hetan pagamentu mak hanesan: Dili Institute of Technology (DIT); East Timor Coffee Institute (ETCI); Institute of Business (IOB); Instituto Boaventura Timor-Leste (IBTL); Instituto Católico Formação de Professores (ICFP); Instituto Ciências da Saúde (ICS); Instituto de Ciências Religiosas (ICR); Instituto Filosófico S. Francisco de Sales (IFFS); Instituto Politécnico de Betano (IPB); Instituto Profissional de Canossa (IPDC); Instituto S. João de Brito (ISJB); Instituto Superior Cristal (ISC); Instituto Superior de Filosofia e Teologia (ISFIT); João Saldanha University (JSU); Universidade de Díli (UNDIL); Universidade da Paz (UNPAZ); Universidade Nacional de Timor Lorosa’e (UNTL); no Universidade Oriental Timor Lorosa’e (UNITAL).

Relasiona ho subsídiu internet, MESSK sei kompleta lai rekezitu ba Operadór Telekomunikasaun sira hanesan Timor Telekom, Telemor no Telkomsel hodi submete hikas ba MF iha tempu badak nia laran atu verifika molok realiza pagamentu ba subsídiu internet nian.