Aileu, 05 Outubru 2023 - Ministru Interiór (MI), Francisco da Costa Guterres, hateten katak governu liuhosi MI tau tiha ona iha planu sei reabilita eskuadra no harii kuartél Polísia Nasionál Timor-Leste (PNTL) iha munisípiu Aileu hodi nune'e PNTL sira iha munisipiu refere bele hala'o sira-nia servisu ho di'ak liután.  

“Ha’u nia vizita ida ne’e mai para atu haree sira-nia kondisaun, ita ezije sira halo servisu, ita mós tenke kria kondisaun ida ba sira atu nune'e bele investe iha infraestrutura. Ita tau tiha ona iha planu para harii kuartél PNTL iha munisípiu Aileu inklui reabilita ba eskuadra, hodi nune’e sira bele hala'o servisu ho di’ak”, dehan Francisco Guterres bainhira hamutuk ho Komandante Jerál PNTL, Komisáriu, Henrique da Costa, hala’o vizita servisu ba komandu PNTL munisípiu Aileu, hodi observa direta kondisaun ne’ebé mak membru sira enfrenta iha terrenu.   

Francisco hateten tan katak vizita dahuluk ida ne’e, atu motiva PNTL Aileu sira hodi servisu ho di’ak liu, mezmu ho kondisaun ladun di'ak, maibé sira mantein firme no eleva sira-nia espíritu hodi bele servi nasaun ida ne’e. Enkuantu Komandante PNTL munisípiu Aileu, Superintendente Polísia, Sebastião Alves Quintão, haksolok ho vizita ne’e hodi bele motiva di'ak liután nia membru sira, inklui aprezenta mós progresu servisu no dezáfiu ne'ebé mak durante ne’e sira hasoru.