Bobonaru, 07 Outubru 2023 - Ministra Edukasaun, Dulce de Jesus Soares, hateten katak nia hamutuk ho administradór postu adminístrativu Kailaku, inklui autoridade lokál sira deside tiha ona atu harii eskola primária ida iha aldeia Ilatbote, suku Goulolo, postu adminístrativu Kailaku, munisípiu Bobonaru hodi bele fasilita estudante sira iha aldeia refere bele asesu ba iha eskola ne'ebé mak besik.

“Diretór infrastrutura nasionál tenke halo dezeñu, tenke mai haree fatin no ita hein katak se bele iha anu letivu foun pelumenus iha tiha ona fatin ida para komesa ona sira-nia prosesu aprendizajen”, dehan Ministra Edukasaun bainhira hala'o vizita ba estudante sira iha aldeia Ilatbote hodi haree direta situasaun ne’ebé sira infrenta iha baze.

Dulce hateten tan katak, karik konstrusaun iha tinan oin la remata sedu, nia sei ko’alia filafali ho xefe suku atu buka fatin ruma, hodi estudante sira bele uza provizóriu atu bele aprende literásia ho numerásia hodi hein konstrusaun. Enkuantu estudante sira iha Aldeia Ilatbote, suku Goulolo hamutuk na'in-78 ne’ebé ho idade hosi tolu to’o sia, sira labele asesu loroloron ba iha eskola primária ida ne'ebé mak lokaliza iha aldeia Poetete tanba ho distánsia ne'ebé mak dook kuaze kilómetru rua hosi aldeia Ilatbote to'o eskola refere.