Dili, 07 Abril 2022 – Ministra Saúde, Odete Maria Freitas Belo, hateten katak planete Terra oras ne’e sofre moras liuliu liga ho mudansa klimátika.

Ministra hato’o asuntu ne’e iha komemorasaun loron Saúde Mundiál ne’ebé Ministériu Saúde realiza ohin (07/4) iha Kaikoli, Dili, ho tema ‘Ita-nia Planeta, Ita-nia Saúde’.

“Tema ne’e bastante pertinente ba kontextu atuál ne’ebé mundu enfrenta, tanba realidade hatudu mai ita katak ita-nia Planeta sofre moras. Ita hotu enfrenta impaktu hosi Mudansa Klimátika ka Climate Change!. Ita labele ignora efeitu hosi Mudansa Klimátika ba saúde umana. Fenómenu hanesan rai manas, rai malirin, inundasaun, rai nakdoko no erupsaun vulkânika, rai maran, anin boot, tempestade no eventu extremu seluk bele iha impaktu diretu ka indiretu ba ita-nia saúde, aléin ne’e bele mós provoka presaun maka'as ba fasilidade saúde no prestasaun servisu saúde ita nian. Au mezmu tempu, poluisaun, kontaminasaun bee-moos, saneamentu inadequadu (inklui jestaun lixu), ka risku balu hosi produtu kímiku ho impaktu negativu ne’ebé relasiona ho mudansa klimátika sai nu'udar ameasa ambientál ne’ebé urjente liu ba saúde públika iha ita-nia rai, iha ita-nia rejiaun no iha mundu tomak,” Ministra Odete dehan.

Nia husu ba timoroan hotu-hotu atu ida-idak prezerva saúde hodi hadi’a kualidade moris.

“Loron ida ne’e importante tebes tanba tinan-tinan nasaun hotu komemora hodi sensibiliza populasaun iha mundu kona-ba importánsia no valór atu preserva ita-nia saúde hodi hadi’a kualidade ita-nia moris,” Ministra dehan.