Ainaru, 20 Setembru 2021 – Ministru Justisa (MJ) Manuel Cárceres da Costa loka ka halo abertura ba Formasaun Téknika Exatidaun ba Ministériu Justisa nia funsionáriu hamutuk na’in-20, iha segunda (20/9) ne’e iha Manubise, Ainaru.
MJ husu ba funsionáriu na’in-20 ne’ebé kompostu hosi feto 12 no mane 8 ne’e atu aproveita formasaun ne'e ho di’ak nune'e bele mellora liután profisionalidade funsionáriu sira nian, liuliu funsionáriu sira hosi Diresaun Nasionál Terras no Propriedade, no funsionáriu Rejistu Notariadu no Aprovisionamentu nian.
Iha fatin hanesan, Komisáriu Funsaun Públiku Antonio Freitas husu ba ba funsionáriu sira, liuliu ba funsionáriu Terras no Propriedade no Rejistu Notariadu nian atu bele aproveita ho di’ak nune'e bele fó atendimentu ba públiku ho profisionál liután.
Tuir ajenda, formasaun refere sei hala'o durante loron lima, no ba funsionáriu ne'ebé kompleta formasaun ne'e to'o oras 48 sei hetan sertifikadu.
Fonte: Mídia Ministério da Justiça (MJ)