Dili, 06 Jullu 2021 – Ministru Justisa (MJ) Manuel Cárceres informa katak to’o loron ohin (06/7) parte saúde rejista Prizioneiru hamutuk na’in-59 iha Prizaun Glenu, Ermera, mak pozitivu infetadu Covid-19, no iha mós Guarda Prizionál na’in-1.
“Ha’u informa ba sua exelénsia Primeiru-Ministru (Taur Matan Ruak) katak to’o ohin (06/7) iha Glenu ita-nia maluk prizioneiru sira ne’e na’in-59 mak infetadu Covid-19, maibé sira asintomátiku tanba ne’e sira-nia situasaun di’ak hela, Servisu Saúde Munisipál Ermera nian mós tau-matan hela ba sira. […] Prizioneiru na’in-59 no Guarda Prizionál ida (mak infetadu), no Guarda Prizionál ne’e halo auto-konfinamentu iha nia uma,” MJ informa hafoin hasoru malu ho Primeiru-Ministru Taur Matan Ruak ohin iha Faról, Dili.
MJ akresenta katak iha Prizaun Suai, Kovalima, to’o agora na’in-1 mak sei pozitivu infetadu hela, no iha prizaun Bekora, Dili, livre tiha ona.
Fonte: Mídia Ministério da Justiça (MJ)