Dili, 09 Jullu 2021 – Ministra Saúde Odete Freitas Belo informa ba ema hotu-hotu katak molok atu ba simu vasina kontra Covid-19 tenke hán bosu, deskansa no hemu bee barak, no hafoin simu tiha vasina labele ansi fila sedu ba uma.
“Antes atu mai vasina tenke hán bosu, kalan tenke deskansa, hemu bee barak no depois simu tiha vasina túr iha ne’e (sentru vasinasaun) atu profisionál saúde sira bele observa ita-boot, lalika ansi lalais ba uma, mai vasina ne’e tenke preparadu ho neon ho laran, no labele fila lalais, túr iha ne’e minutu 30 hanesan ne’e kuandu sente laiha ona reasaun buat ruma depois mak fila ba uma,” dehan Ministra Odete ohin (09/7) iha serimónia lansamentu imunizasaun kontra Covid-19 ho vasina AstraZeneca Doze Daruak nian, iha Sentru Saúde Metinaru, Dili.
Ministra mós hateten katak uza de’it máskara la sufisiente atu evita-an hosi Covid-19, tanba ne’e nia husu atu ema hotu-hotu kumpri nafatin regra seluk tán hanesan fase-liman ho sabaun, uza hand sanitizer, distánsia sosiál, evita kaer oin no ba simu vasina.
Fonte: Mídia Palácio das Cinzas