Dili, 06 Outubru 2021 – Médiku Jerál Sentru Saúde (SS) Komoro, Dili, Florentina do Rego, relata katak SS Komoro kontinua rejista moras infesaun respiratória barak liu kompara ho moras seluk, no tuir kedas mak moras kulit.

“Moras ne’ebé mak aas liu ne’ebé rejista iha Sentru Saúde Komoro mak moras ISPA (tétun, Infesaun Repiratória) relasaun liu kona-ba infesaun respirasaun nian, segundu mak moras kulit,” Florentina informa, ohin (06/10), iha nia knaar-fatin, Komoro, Dili.

Nia dehan katak tipu moras infesaun respiratória kontinua rejista barak tanba rai-rahun no mós ahi-suar ninia impaktu.

“Moras ne’e iha relasaun liu hosi kondisaun ambientál hanesan rai-rahun ka dalaruma te’in uza ahi sira ne’e entaun nia suar ne’e mak dalaruma halo komunidade sensitivu sira hetan moras ida ne’e,” nia dehan.

Médiku Jerál ne’e mós husu ba komunidade sira ne’ebé hetan sintoma moras repiratória ruma katak dalan di’ak liu mak ba aprezenta-an iha Sentru Saúde sira hodi prevene mós moras seluk liuliu Covid-19 iha tempu pandemia ne’ebé Timor-Leste enfrenta hela.