Guinea, 07 Setembru 2021 – Militár nasaun Guinea halo golpe hodi kaptura tiha Prezidente Guinea Alpha Conde iha domingu (5/9/2021) ne’e depois-de iha parte dadeer akontese uluk kilat tarutu iha área besik palásiu prezidensiál iha Guinea nia kapitál Konakri, haktuir The Guardian.
Hafoin ida ne’e, parte líder militár Guinea anunsia liuhosi kanál televizaun Governu nian katak sira disolve ona Governu ho golpe. Fronteira sira taka hotu no parte militár mós afirma katak konstituisaun la legál ona.
The Guardian haktuir, golpe militár ne’e akontese tanba relasiona ho alterasaun ba konstituisaun ne’ebé halo Prezidente Conde ukun to’o períodu datoluk. Hafoin altera tiha konstituisaun, Alpha Conde eleitu tán nu’udar Prezidente Guinea iha Outubru 2020 ba períodu datoluk nian.
“Ami lakohi ona atu fó fiar polítika ba ema ida de’it. Ami sei fó fiar ba povu,” dehan Koronél Forsa Terestre Mamadi Doumbouya ba povu Guinea liuhosi anúnsiu ne’ebé nia lee iha televizaun nasionál Guinea.
To’o oras ne’e seidauk hatene Prezidente Alpha Conde iha ne’ebé, maibé Doumbouya hateten katak Conde iha fatin seguru.
Alein hosi hamosu golpe tanba alterasaun ba konsituisaun, militár mós informa katak Prezidente Alpha Conde nia lideransa hamosu korupsaun barak liu.
Komunidade ida iha sidade Konakri informa mós katak korupsaun sa’e maka’as tebes iha nasaun refere durante Conde sai nu’udar Prezidente.
Fonte: The Guardian