Dili, 19 Novembu 2021- Motorista mikrolete 07 ezije Governu liuliu parte Obras Públika atu ho urjente hadi'a lalais ponte ne’ebé aat no abandona hela iha parte Ai-lo’ok Laran, Dili.
“Ami ezije nafatin ba Obras Públika atu haree lalais dalan ne’e atu nune’e bemo (mikrolete) bele la’o normál fila-fali”, motorista Octavio de Fátima Lemos de Jesus ba Timor, News ohin (19/11), iha Ai-lo’ok Laran, Dili.
Nia kestiona, dalan provizóriu ne’ebé agora daudauk sira uza hodi halo operasaun tula pasajeiru ne’e la konfortável tanba kondisaun ladún di'ak no kloot, difísil ba kareta atu sees-malu no fó impaktu la di’ak ba kareta nia kondisaun.
Iha fatin hanesan, motorista Elvis Pacheco informa, nia sente difísil ho kondisaun dalan provizóriu ne’ebé iha tanba tenke fó volta dook, kria engarafamentu ho nune’e nia husu ba parte relevante atu aselera lalais ponte ne’ebé mak aat hodi normaliza hikas movimentasaun transporte sira.
“Sente araska loos tanba dalan aat loos, kloot no kria macet (engarafamentu),” Elvis hateten.
Tuir kondisaun ne’ebé Timor News observa iha terenu nota katak, ponte refere kotu totál, no dalan provizóriu ne’ebé transporte públiku no privadu sira uza hodi halo movimentu ba-mai iha parte Ai-lo’ok Laran kondisaun aat no kloot, tanba ne’e transporte públiku hanesan taxi no mikrolete 07 ne'ebé mak halai diresaun ne'ebá balu deside para, la halo operasaun relasiona ho kondisaun dalan ne'ebé mak iha.
Fonte: Timor News