Dili, 26 Abril 2022 – Kondutór transporte públiku ne’ebé sirkula iha sidade Dili hotu-hotu la halo sira-nia atividade tanba pasajeiru sira selu la tuir tarefa no sira halo asaun greve ne’e la’os tanba haree ba mina nia folin sa’e.

“Ami-nia objetivu hala’o asaun ne’e, iha primeiru dia ami ezije no hato’o ba parte relevante liuliu ba Ministériu Diresaun atu responde ba ami-nia ezijénsia, objetivu ne’ebé ami halo la refleta ba mina folin sa’e, maibé ami haree liu ba tarefa pasajeiru, no  ida koalia kona-ba subsídiu  seletivu ne’ebé fó sai hosi Prezidente Tane Konsumidór ko’alia kona-ba subsídiu seletivu liuliu ba mikrolete no taxista ne’ebé seidauk hetan rezultadu,” hateten kondutor mikrolete João do Rego, ohin (26/4), iha Merkadu Lama, Dili.

Porta-vóz Egas Ximenes da Costa hateten katak sira halo asaun ne’e hodi ezije ba parte Ministériu relevante atu responde ba situasaun refere.

“Ami hala’o asaun ne’e la refleta ba mina nia folin sa’e maibé liga liu ba pasajeiru sira ne’ebé selu la tuir tarefa,” nia dehan.

Enkuantu estudante Edmundo Gomes dos Santos expresa nia sentimentu triste tanba mikrolete hotu-hotu la halai no sira la’o de’it ho distánsia dook ba eskola.

“Ami sira hela dook ami tama aula dadeer ami pasensia ami la’o de’it mezmu ke tama aula tarde, no ami husu ba parte Governu rezolve lalais situasaun ne’e,” hateten estudante Edmundo, ohin iha fatin hanesan.