Dili, 14 Setembru 2021 – Motorola aprezenta teknolojia ida hanaran Space Charging ne’ebé sira kria ho funsaun atu karega bateria telemóvel liuhosi ár no la uza fiu/kabu ruma.
techradar.com haktuir iha segunda (14/9) ne’e katak, liuhosi konta ofisiál mídia sosiál China Weibo, Motorola publika deskrisaun kona-ba teknolojia Space Charging, ne’ebé esplika katak teknolojia refere iha kapasidade atu karega telemóvel no dispozitivu similár seluk tán nia bateria liuhosi ár ho distánsia entre metru 3.
Seidauk sertifika bainhira loos mak Motorola nia produtu Space Charging ne’e sei fa’an iha merkadu, maibé péritu ida ne’ebé sira servisu mós iha projetu refere fó sinál katak produtu ne’e besik ona atu tama ba faze komersializasaun iha merkadu.
Molok ne’e, iha tinan kotuk Xiaomi mós aprezenta uluk ona ninia produtu ne’ebé ho funsaun hanesan katak hodi karega dispozitivu liuhosi ár sein fiu/kabu.
Motorola afirma katak sira-nia produtu Space Charging ka karegamentu espasiál ne’e bele karega dispozitivu haat dala ida de’it. Space Charging bele karega dispozitivu sira ho distánsia metru 3 no iha área estasaun karegamentu ne’ebé ho grau 100. Maibé, tanba razaun seguransa, karegamentu sei para wainhira teknolojia ne’e deteta ema nia prezensa iha área estasaun karegamentu nia klaran.
Laiha afirmasaun ofisiál ruma kona-ba ninia velosidade karegamentu bateria, maibé Digital Chat Station informa katak Space Charging iha kapasidade karegamentu máximu 5 Watt.
Fonte: Technoradar