Dili, 19 Setembru 2021 – Ministériu Saúde (MS) Timor-Leste liuhosi Sentru Integradu Jestaun Krize (SIJK) kontinua apela ba populasaun sira iha Timor-Leste katak tenke ba sentru saúde ka ospitál wainhira sente sintoma Covid-19 hanesan isin-manas no mós sintoma seluk tán.
“Apela ba populasaun iha Dili laran no mós iha munisípiu sira seluk, atu aprezenta-an iha fasilidade saúde (sentru saúde ka ospitál) ne’ebé besik, wainhira sente isin-manas, kakorok moras, inus-been, ka me’ar, hodi bele hetan atendimentu hosi profisionál saúde sira. Wainhira sedu liu hatene sé vírus ne’e kona ita ka lae, di’ak liu,” MS apela liuhosi komunikadu imprensa ne’ebé Timor News asesu ohin (19/9).
MS mós husu atu populasaun sira kontinua respeita no kumpri regra prevensaun Covid-19 ne’ebé Governu hatuur ona hodi prevene transmisaun Covid-19.
“Regra sira ne’e mak hanesan ita hotu hatene ona mak, Uza máskara, fase liman beibeik ho sabaun ka uza dezinfetante ruma, evita kose liman ba matan, inus ho ibun, wainhira kumprimenta malu la presiza kaer liman, bensa-liman, re’i-malu ka haku’ak malu, evita halibur malu barak, hamriik ka túr dook hosi ema seluk mínimu metru ida ho balu,” esplika iha komunikadu refere.
Fonte: Mídia Palácio das Cinzas