Likisá, 10 Novembru 2021 - Ministra Saúde, Odete Maria Freitas Belo, akompaña hosi Diretora Nasionál Administrasaun, Lojístika no Patrimóniu, Emilia de Jesus, iha kuarta (10/11) ne’e, entrega kareta Ambulánsia multi-funsaun ida ba Sentru Saúde Bazartete, munisípiu Likisá.
"Primeiru ha'u hakarak atu dehan kareta ambulánsia ne'e importante teb-tebes ne'ebé wainhira sasán sira ne'e iha tiha ita tenke utiliza, ita tenke uza," dehan Ministra Saúde ba komunidade sira, iha sede suku Leorema.
Ministra ne’e afirma tán katak, ho númeru populasaun ne’ebé barak iha fatin refere iha direitu atu hetan tán postu saúde ka transporte ruma bazeia ba totál númeru populasaun ne’ebé oras ne’e hamutuk rihun 16.
"Ita-boot sira ohin iha transporte ida ba ita liuhosi sentru saúde Bazartete ne'ebé mak sei haree ida ne'e i iha mós suku haat ne'ebé mak ohin temi iha ne'e ho nia númeru populasaun wainhira ita soma hamutuk rihun 16. Ita-boot sira iha direitu atu hetan postu saúde ka ita-boot sira iha direitu atu hetan transporte ruma," nia afirma.
Fonte: Mídia Palácio das Cinzas