Dili, 07 Marsu 2022 – Ministra Saúde (MS), Odete Freitas Belo, hamutuk ho Reprezentante Organizasaun Mundiál ba Saúde (OMS) iha Timor-Leste, Dr. Arvind Mathur, lansa mata-dalan ba Jestaun Klínika ba Moras Denge, ohin (07/3) iha salaun Novo Turismo, Lesidere, Díli.

MS hateten, parte Ministériu Saúde nafatin halo promosaun saúde maibé husu ba sidadaun hotu-hotu atu halo limpeza tanba limpeza mak sai dalan ida atu hakotu siklu moris susuk nian atu labele tata ema.

“Husu para atu hamoos ita-boot sira-nia tanke, roda sira ne’ebé mak iha tenke hamamuk, bee ne’ebé mak ita uza tenke taka, roupa iha uma laran, kona-ba limpeza, oinsá atu halo limpeza atu nune’e ita labele hakiak susuk inan ou susuk boot ne’e ita mós bele hamate susuk nia tolun ho ninia larva iha ita-nia uma, ida-ne’e de’it simples ita bele hakotu ona siklu moris susuk nian i susuk ne’e sei la tata ema no moras ne’e sei la hada’et ba ita maibé hanesan ita ko’alia katak ita problema teb-tebes iha asuntu limpeza nian, ambiente ne’e ita problema teb-tebes maibé nafatin Ministériu Saúde hateten katak ita iha problema maibé asaun sira ne’e ita kontinua halo,” MS hateten iha nia intervensaun.

Kona-ba fumigasaun, MS hateten katak sei halo tuir protokolu saúde nian hanesan ba uma-kain ne’ebé mak detekta ona kazu denge.