Dili, 22 Jullu 2021 – Ministériu Saúde (MS) komemora aniversáriu Loron Nasionál Saúde ba dala-5 ho tema ‘Fortalesimentu Prontidaun Servisu Saúde Públika Hasoru Covid-19 Nu’udar Dalan ba Nova Normalidade Iha Atendimentu Públiku’, iha kinta (22/7) ne’e iha munisípiu Kovalima.
“Loron Nasionál Saúde sai hanesan loron importante iha ita-nia nasaun hodi halo reflesaun ba povu nia direitu no estadu timoroan nia devér atu kria kondisaun ne’ebé di’ak no dignu atu asegura kobertura universál saúde ba populasaun. Maske iha situasaun Covid-19 maibé MS hamutuk ho entidade hotu selebra Loron Nasionál Saúde hodi hafanun ita hotu ba importánsia moris di’ak no saudável liuliu iha pandemia Covid-19,” dehan Ministra Saúde Odete Freitas Belo iha nia diskursu wainhira partisipa iha serimónia komemorasaun ne’e.
Iha serimónia aniversáriu ne’e, hala'o mós lansamentu livru manuál Planu Estratéjiku Nasionál Setór Saúde versaun daruak 2011-2030, lansamentu Relatóriu Servisu Ministériu Saúde tinan 2020, no lansamentu Kampaña Konjunta Munisipál Vasinasaun Covid-19 nian.
Fonte: Mídia Palácio das Cinzas