Dili, 10 Maiu 2021 – Ministériu Saúde (MS) liuhosi Ministra Saúde Odete Freitas Belo, hamutuk ho Vise Ministru Saúde Bonifácio Mau Coli dos Reis, halo lansamentu ba vasinasaun ka imunizasaun kontra Covid-19 ho vasina AstraZeneca doze dahuluk ba faze daruak nian ne’ebé apoia hosi Governu Austrália, ohin (10/5) iha Komoro, Dili, nu’udar parte kontinuasaun ida hosi Governu nia esforsu hodi kombate Covid-19.
“Loron ohin ita halo abertura vasina ne’ebé mak oferese liuhosi dalan bilateral, no vasina ne’e mai hosi Austrália. Ita hakarak atu ema labele dehan vasina ne’e la di’ak, atu labele dehan fó informasaun la klaru kona-ba vasina ne’e entaun ita konvida Embaixadór Austrália nian no nia mós disponível atu bele hetan vasina primeiru hosi fábrika ne’ebé mak mai hosi Austrália,” dehan Ministra Odete.
Vasina Covid-19 doze dahuluk ne’ebé uza iha faze daruak ne’e apoia hosi Austrália no to’o iha Timor-Leste iha loron hirak liubá, tanba molok Austrál prodúz vasina refere, Primeiru-Ministru Taur Matan Ruak halo kedas komunikasaun ho parte Governu Austrália atu Timor-Leste mós bele hetan doze ruma, tuir Ministra Odete salienta.
Iha lansamentu ne’e, Embaixadór Japaun mós partisipa hodi simu vasina, Embaixadór Austrália, Diretór Sentru Integradu Jestaun Krize (SIJK), Reprezentante DFAT no autoridade lokál balu.
Fonte: Mídia Palácio das Cinzas