MS: POLUISAUN IHA TIMOR-LESTE HALO KAZU MORAS OIOIN AUMENTA
Dili, 07 Abril 2022 – Ministra Saúde (MS), Odete Freitas Belo, hateten katak Timor-Leste oras ne’e enfrenta mós moras oioin ne’ebé kauza hosi poluisaun.
“Apesar de ita kontinua enfreta pandemia Covid-19, Timor-Leste enfrenta mós problema saúde sira seluk ne’ebé relasiona ho poluisaun hosi ita-nia rai, hanesan aumentu signifikativu moras kankru, infesaun respiratória, asma, moras kardiovaskulár. Tanba ne’e, tinan 2022, selebrasaun Loron Mundiál Saúde fokus atensaun ba líder mundiál sira atu hamutuk bele kompromete ba asaun ne’ebé kontribui ba planeta ida ne’ebé saudável, sustentável no ho abitante ne’ebé saudável,” Ministra dehan iha eventu komemorasaun loron Saúde Mundiál ne’ebé Ministériu Saúde realiza ohin (07/4) iha Kaikoli, Dili, ho tema ‘Ita-nia Planeta, Ita-nia Saúde’.
Nia akresenta, tanba ne’e, ho apoiu hosi Organizasaun Mundiál ba Saúde (OMS)-SEARO, Ministériu Saúde lidera prosesu revisaun Planu Estratéjiku Nasionál Saúde Ambientál no Sanitária ne’ebé kobre períodu 2021-2026.
“Durante tinan ikus, Ministériu Saúde haforsa kapasidade rekolla, análize no publikasaun dadus hosi sistema informasaun saúde, relatóriu hosi Monitorizasaun no Avaliasaun Programa xave sira hosi Saúde Públika, inklui mós dadus estatístiku hosi Vijilánsia Epidemiolójika hodi fasilita resposta ne’ebé adekuada hodi minimiza impaktu hosi mudansa klimátika,” nia hateten.
Fonte: Mídia Palácio das Cinzas
