Dili, 27 Setembru 2021 – Ministériu Turizmu, Komérsiu no Indústria (sigla portugés, MTCI) liuhosi Diresaun Nasionál Empreendedorizmu ba Atividade Turístiku, iha domingu (26/9) ne’e iha Lesidere, Dili, organiza atividade kompetisaun pintura hodi promove joven sira-nia talentu, no ho objetivu atu komemora mós loron mundiál Turizmu ne’ebé sempre komemora kada tinan iha 27 Setembru.
“Joven sira durante ne’e iha talentu, maibé ita seidauk tau prioridade, tanba ne’e liuhosi atividade sira ne’e, nune’e sira bele kontinua sira-nia atividade, Ministériu Turizmu, Komérsiu & Indústria, fó apoiu ba joven sira hodi bele insentiva sira-nia atividade, nune’e sira bele kontinua hatudu kreatividade ne’ebé mak sira iha,” informa Diretór Nasionál Empreendedorizmu ba Atividade Turístiku Júlio Ximenes Ribeiro, iha Sentru Informasaun Turístiku, Lisidere.
Tema Nasional ba kamoemorasaun loron Mundial Turizmu tinan ne’e maka ‘promove marka turizmu liu husi pintura’. Iha atividade pintura ne’e, partisipa hosi grupu 10, kompostu hosi Gembel, Arte Furak, Arte Uma Lalatak, Mafima Arte no seluk tán.
Enkuantu prémiu ba kompetisaun pintura ne’e, ba primeiru lugár hetan $3000, segundu lugár $2.200 no terseiru lugár $1.500.
Fonte: Mídia Ministério do Turismo, Comércio e Indústria (MTCI)