Dili, 23 Setembru 2021 – Konselleiru Máximu Partidu Kmanek Haburas Unidade Nasionál Timoroan (KHUNTO) José dos Santos ‘Naimori Bucar’ hateten katak partidu tolu ne’ebé oras ne’e kaer ukun hanesan Frente Revolucionário de Timor-Leste Independente (FRETILIN), Partidu Libertasaun Populár (PLP) no KHUNTO rasik tenke kontinua hamutuk hodi dezenvolve Timor-Leste liuhosi Orsamentu Jerál Estadu (OJE).
“Tenke hamutuk nafatin hodi lori dezenvolvimentu ba povu no nasaun liuhosi Orsamentu Jerál Estadu,” Naimori dehan hafoin hasoru malu tiha ho Prezidente Parlamentu Nasionál (PPN) Aniceto Guterres Lopes, ohin (23/9) iha Gabinete PPN nian, Dili, haktuir Parlamentu Nasionál nia divulgasaun.
Enkuantu audénsia entre parte rua ne’e ho objetivu atu hametin koordenasaun entre Bankada Governu hodi prepara didi’ak ba diskusaun no aprovasaun OJE 2022 nian.
Fonte: Media Parlamento Nacional